សហរដ្ឋអាមេរិក៖ អាមេរិកមានផែនការក្នុងការបើកស្ថានទូតរបស់ខ្លួនប្រចាំនៅប្រទេសវ៉ានូអាទូ (Vanuatu) ដែលជាដែនដីស្ថិតនៅភាគខាងត្បូងនៃមហាសមុទ្រប៉ាស៊ីហ្វិក។ នេះបើតាមក្រសួងការបរទេសបានបញ្ជាក់ឱ្យដឹងនៅថ្ងៃសុក្រម្សិលមិញនេះ ខណៈនេះវិធានការចុងក្រោយរបស់ទីក្រុងវ៉ាស៊ីនតោន ក្នុងការជំរុញវត្តមានការទូតរបស់ខ្លួន នៅក្នុងតំបន់ប៉ាស៊ីហ្វិក ដើម្បីទប់ទល់នឹងឥទ្ធិពលដែលកំពុងកើនឡើងរបស់ចិន។

ក្រសួងការបរទេសអាមេរិកបានបញ្ជាក់ថា ស្របតាមយុទ្ធសាស្ត្រឥណ្ឌូប៉ាស៊ីហ្វិករបស់សហរដ្ឋអាមេរិក វត្តមានការទូតអចិន្ត្រៃយ៍នៅវ៉ានូអាទូនឹងអនុញ្ញាតឱ្យរដ្ឋាភិបាលសហរដ្ឋអាមេរិកធ្វើឱ្យទំនាក់ទំនងកាន់តែស៊ីជម្រៅជាមួយមន្ត្រីរដ្ឋាភិបាល និងប្រជាជននៃប្រទេសនេះ។ ការបង្កើតស្ថានទូតអាមេរិកប្រចាំនៅរដ្ឋធានី Port Vila នឹងជួយសម្រួលដល់ផ្នែកនៃកិច្ចសហប្រតិបត្តិការទ្វេភាគីដែលមានសក្តានុពល និងជំនួយអភិវឌ្ឍន៍ រួមទាំងកិច្ចខិតខំប្រឹងប្រែងដើម្បីដោះស្រាយវិបត្តិអាកាសធាតុ។

គួរបញ្ជាក់ថា បច្ចុប្បន្នសហរដ្ឋអាមេរិកមានទំនាក់ទំនងការទូតជាមួយប្រទេសវ៉ានូអាទូផងដែរ ដែលប្រទេសនេះមានប្រជាជនប្រមាណ ៣១៩,០០០នាក់ ដែលរស់នៅពាសពេញកោះចំនួន ៨០ ដែលបច្ចុប្បន្នកំពុងមានការទំនាក់ទំនងដោយតំណាងនៅក្នុងប្រទេសញូវហ្គីណេ (New Guinea)។ គួរបញ្ជាក់ថា សហរដ្ឋអាមេរិកបានបើកស្ថានទូតរបស់ខ្លួនឡើងវិញនៅកោះ Solomon ក្នុងឆ្នាំនេះ បន្ទាប់ពីអវត្តមានអស់រយៈពេល ៣០ឆ្នាំ។

ក្រៅពីគម្រោងបើកស្ថានទូតរបស់ខ្លួនប្រចាំនៅប្រទេសវ៉ានូអាទូ សហរដ្ឋអាមេរិកក៏មានផែនការក្នុងការបើកស្ថានទូតរបស់ខ្លួនប្រចាំប្រទេសដែនកោះក្នុងមហាសមុទ្រប៉ាស៊ីហ្វិកផ្សេងៗទៀតដូចជា គីរីបាទី (Kiribati) និងតុងហ្គា (Tonga)។ យ៉ាងណាក៏ដោយ បើទោះជាមានការប្រកាសជំរុញទំនាក់ទំនងការទូតពីសហរដ្ឋអាមេរិកក្តី ក៏កោះសូឡូម៉ុនបានប្រកាសក្នុងខែនេះថា ខ្លួនបានផ្តល់កិច្ចសន្យាតម្លៃរាប់លានដុល្លារដល់ក្រុមហ៊ុនរដ្ឋរបស់ចិន ដើម្បីធ្វើឱ្យប្រសើរឡើងនូវកំពង់ផែអន្តរជាតិនៅ Honiara របស់ខ្លួន៕